സിയാറ്റില്‍: ലോകകപ്പ് ഫുട്ബോളില്‍ അവിശ്വസനീയമായ തിരിച്ചുവരവുമായി ബെല്‍ജിയം അവസാന പതിനാറിലേക്ക്. രണ്ട് ഗോളിന് പിന്നില്‍ നിന്ന ശേഷം അവസാന മിനിറ്റുകളില്‍ മിന്നുന്ന പ്രകടനത്തിലൂടെയാണ് ബെല്‍ജിയം സെനഗലിനെ അട്ടിമറിച്ചത്. അധികസമയത്തേക്ക് നീണ്ട പോരാട്ടത്തിനൊടുവില്‍, അവസാന നിമിഷം ലഭിച്ച വിവാദ പെനാല്‍റ്റി ഗോളാക്കി മാറ്റിയ നായകന്‍ യൂറി ടൈലെമാനസാണ് ബെല്‍ജിയത്തിന് വിജയം സമ്മാനിച്ചത്. സ്കോര്‍: 3-2. പ്രീക്വാര്‍ട്ടറില്‍ യു.എസ്.എയാണ് ബെല്‍ജിയത്തിന്‍റെ എതിരാളികള്‍. ജൂലൈ 7ന് സിയാറ്റിലില്‍ വെച്ചാണ് മത്സരം. മത്സരത്തിന്‍റെ തുടക്കം മുതല്‍ക്ക് തന്നെ സെനഗലിന്‍റെ ആധിപത്യമായിരുന്നു. പതിമൂന്നാം മിനിറ്റില്‍ ഇസ്മായില സാറിന്‍റെ ഷോട്ട് പോസ്റ്റിലിടിച്ച് തെറിച്ചു. എന്നാല്‍ 25ാം മിനിറ്റില്‍ സാറിന്‍റെ ഹെഡര്‍ വീണ്ടും പോസ്റ്റില്‍ തട്ടി മടങ്ങിയപ്പോള്‍, കൃത്യമായ ഇടത്ത് നിലയുറപ്പിച്ച ഹബീബ് ഡിയാര പന്ത് വലയിലെത്തിച്ച് സെനഗലിനെ മുന്നിലെത്തിച്ചു. രണ്ടാം പകുതി തുടങ്ങി ആറാം മിനിറ്റില്‍ (51-ാം മിനിറ്റ്) സെനഗല്‍ ലീഡ് ഉയര്‍ത്തി. പ്രതിരോധ നിര താരം മൂസ നിയാഖാതേ നല്‍കിയ നീളന്‍ പാസ് സ്വീകരിച്ച ഇസ്മായില സാര്‍, ബെല്‍ജിയന്‍ പ്രതിരോധത്തെ കാഴ്ചക്കാരാക്കി അതിമനോഹരമായൊരു ഷോട്ടിലൂടെ പന്ത് വലയിലെത്തിച്ചു. 2-0. പരാജയം ഉറപ്പിച്ച ഘട്ടത്തില്‍ ബെല്‍ജിയം നടത്തിയ തിരിച്ചുവരവാണ് മത്സരത്തിന്‍റെ ഗതി മാറ്റിയത്. 86-ാം മിനിറ്റില്‍ തോമസ് മ്യൂനിയര്‍ നല്‍കിയ ക്രോസ് റോമേലു ലുക്കാക്കു വലയിലെത്തിച്ച് പ്രതീക്ഷ നല്‍കി. തൊട്ടുപിന്നാലെ 89ാം മിനിറ്റില്‍ ലിയാന്‍ഡ്രോ ട്രോസാര്‍ഡിന്‍റെ ക്രോസ് സെനഗല്‍ ഗോള്‍കീപ്പര്‍ മോറി ഡിയാവിന്‍റെ കൈയില്‍ നിന്ന് വഴുതിപ്പോയപ്പോള്‍, തലവെച്ച് യൂറി ടൈലെമാന്‍സ് സ്കോര്‍ നില സമനിലയിലാക്കി (2-2). പെനാല്‍റ്റിയിലേക്ക് നീങ്ങുമെന്ന് കരുതിയ കളി തീരാന്‍ സെക്കന്‍ഡുകള്‍ മാത്രം ശേഷിക്കെയാണ് ബെല്‍ജിയത്തിന് അനുകൂലമായി വിവാദ പെനാല്‍റ്റി ലഭിക്കുന്നത്.
ബെല്‍ജിയം ഉയര്‍ത്തെഴുന്നേറ്റു; സെനഗലിനെ വീഴ്ത്തി പ്രീ ക്വാര്‍ട്ടറില്‍
