കാഞ്ഞങ്ങാട്: പ്രവാസി കുടുംബങ്ങള്‍ക്ക് തിരിച്ചടിയായി സഊദിയില്‍ ഫാമിലി വിസിറ്റ് വിസ കാലാവധി വെട്ടിച്ചുരുക്കി. നിലവില്‍ സിംഗിള്‍ എന്‍ട്രിയില്‍ ലഭിച്ചിരുന്ന മൂന്നുമാസം കാലാവധി രണ്ട് മാസമാക്കിയാണ് കുറച്ചത്. ബിസിനസ് വിസ കാലാവധിയിലും കുറവുവരുത്തിയിട്ടുണ്ട്. ബിസിനസ് വിസയുടെയും കാലാവധി രണ്ട് മാസമാണ്. തിങ്കളാഴ്ച മുതല്‍ ഇന്ത്യയിലെ മുംബൈ സഊദി കോണ്‍ സുലേറ്റ് നല്‍കിയ ഫാമിലിസന്ദര്‍ശക വിസയിലാണ് ഇക്കാര്യം രേഖപ്പെടുത്തിയിരിക്കുന്നത്. അതേസമയം, കാലാവധി പരിഷ്കരണം സംബന്ധിച്ച് ഔദ്യോഗിക പ്രതികരണങ്ങള്‍ ലഭ്യമല്ല. നേരത്തെ സ്റ്റാമ്പ് കാലാവധി രേഖ പ്പെടുത്തിയവര്‍ക്ക് അത്രയും ദിവസം സഊദിയില്‍ താമസിക്കുന്നതിന് തടസമില്ല. മൂന്നുമാസം കഴിയുമ്പോള്‍ സിംഗിള്‍ എന്‍ട്രി വിസ ഓണ്‍ ലൈനിലൂടെ പുതുക്കാന്‍ സാധിക്കും. ഏതാനും ആഴ്ചകള്‍ക്ക് മുമ്പ് ഫാമിലി സന്ദര്‍ശക വിസ അപേക്ഷ, സ്റ്റാമ്പിങ് തീയതികളില്‍ പരിഷ്കരണം വരുത്തിയിരുന്നു. ഫാമിലി സന്ദര്‍ശക വിസ നാട്ടില്‍ നിന്ന് സ്റ്റാമ്പ് ചെയ്ത് ഒരു മാസത്തിനുള്ളില്‍ സഊദിയില്‍ പ്രവേശിച്ചിരിക്കണമെന്നതാണ് പ്രധാന മാറ്റം. നേരത്തെ ഇതിന് മൂന്നുമാസം വരെ സമയം ഉണ്ടായിരുന്നു. വിസ അപേക്ഷ പ്രോസസ് സമയവും ഒരു മാസമാക്കി ചുരുക്കി. എന്നാല്‍, സഊദിയില്‍ ഇറങ്ങിയാല്‍ വിസയില്‍ രേഖപ്പെടുത്തിയത് പോലെ 90 അല്ലെങ്കില്‍ 60 ദിവസം വരെ നില്‍ക്കാന്‍ സാധിക്കും. ശേഷം ഓണ്‍ലൈനിലൂടെ ഇന്‍ഷുറന്‍സ്, ഫീസ് അടച്ച് പുതുക്കാം.
സൗദിയില്‍ ഫാമിലി വിസിറ്റിംഗ് വിസ കാലാവധി രണ്ടുമാസമായി വെട്ടിച്ചുരുക്കി
