തിരുവനന്തപുരം: ബിഎല്‍എം സാമ്പത്തിക തട്ടിപ്പ് കേസില്‍ ചെന്നൈയിലും കേരളത്തിലെ വിവിധ ഇടങ്ങളിലും എന്‍ഫോഴ്സ്മെന്‍റ് ഡയറക്ടറേറ്റ് റെയ്ഡ് തുടങ്ങി. കോഴിക്കോട്, തൃശ്ശൂര്‍, തിരുവനന്തപുരം, ഇടുക്കി, കൊച്ചി തുടങ്ങിയ സ്ഥലങ്ങളിലെ ബിഎല്‍എം ഓഫീസുകളിലും വ്യക്തികളുടെ വീടുകളിലുമാണ് പരിശോധന നടത്തുന്നത്. ബിഎല്‍എന്‍റെ പേരില്‍ ശേഖരിച്ച പണം വകമാറ്റിയ സംഭവത്തില്‍ തെളിവു തേടിയാണ് അന്വേഷണം. ചെന്നൈ ഇഡി ഓഫീസിലെ ഉദ്യോഗസ്ഥരാണ് പരിശോധനക്ക് നേതൃത്വം നല്‍കുന്നത്.
നിക്ഷേപകരില്‍ നിന്ന് സമാഹരിച്ച പണം വഴിമാറ്റിയെന്ന ആരോപണവും സ്ഥാപനത്തിന്‍റെ പേരില്‍ സമാഹരിച്ച പണം വ്യക്തികളുടെയും കുടുംബാംഗങ്ങളുടെയും അക്കൗണ്ടുകളിലേക്ക് എത്തിയെന്ന സംശയവും നിലനില്‍ക്കെയാണ് കേന്ദ്ര ഏജന്‍സിയുടെ നടപടി. കേരള ക്രൈംബ്രാഞ്ച് അന്വേഷിച്ചുവരുന്ന കേസില്‍ അപ്രതീക്ഷിതമായിരുന്നു ഇഡി പരിശോധന. സംഭവത്തില്‍ ബിഎല്‍എം ചെയര്‍മാന്‍ ആര്‍. പ്രേംകുമാറിനെതിരായ അന്വേഷണം കൂടുതല്‍ ശക്തമായിരിക്കുകയാണ്. ബിഎല്‍എമ്മിന്‍റെ പ്രധാന രേഖകളും സാമ്പത്തിക ഇടപാടുകളുമായി ബന്ധപ്പെട്ട വിവരങ്ങളും ചെന്നൈയിലെ പ്രധാന ഓഫീസില്‍ ഉണ്ടാകാം എന്നതിനാല്‍ പരിശോധനക്ക് വലിയ പ്രാധാന്യമുണ്ട്. നിക്ഷേപകരില്‍നിന്ന് സ്വീകരിച്ച തുകകള്‍ ഏതൊക്കെ അക്കൗണ്ടുകളിലേക്ക് കൈമാറി, അവ പിന്നീട് എവിടെയൊക്കെ വിനിയോഗിച്ചു, സ്ഥാപനത്തിന്‍റെ പേരില്‍ വാങ്ങിയ സ്വത്തുക്കളുടെ യഥാര്‍ഥ ഉടമകള്‍ ആരാണ് തുടങ്ങിയ കാര്യങ്ങളിലാണ് പ്രധാന അന്വേഷണം.
പ്രേംകുമാറിനെതിരായ അന്വേഷണത്തില്‍ ഇഡി നേരത്തേ തന്നെ ഇസിഐആര്‍ രജിസ്റ്റര്‍ ചെയ്തിരുന്നു. കള്ളപ്പണം വെളുപ്പിക്കല്‍ തടയല്‍ നിയമപ്രകാരമുള്ള അന്വേഷണത്തിന്‍റെ ഭാഗമായാണ് ഈ നടപടി. ബിഎല്‍എമ്മിന്‍റെ പേരില്‍ സമാഹരിച്ച പണം നിയമവിരുദ്ധമായി കൈമാറിയിട്ടുണ്ടോ, വിവിധ സ്ഥാപനങ്ങളിലൂടെ പണം വഴിമാറ്റിയിട്ടുണ്ടോ, വിദേശത്തേക്കുള്ള പണമൊഴുക്കോ ഹവാല ഇടപാടുകളോ നടന്നിട്ടുണ്ടോ തുടങ്ങിയ കാര്യങ്ങളാണ് പരിശോധിക്കുന്നത്. ഇസിഐആര്‍ രജിസ്റ്റര്‍ ചെയ്തതോടെ സംസ്ഥാന ക്രൈംബ്രാഞ്ചിന്‍റെ അന്വേഷണത്തിനു പുറമെ കേന്ദ്ര ഏജന്‍സിയുടെ പരിശോധനയ്ക്കും വഴിതുറന്നിരിക്കുകയാണ്.
ബിഎല്‍എമ്മിന്‍റെ പണം സ്വകാര്യ ആവശ്യങ്ങള്‍ക്കായി ഉപയോഗിച്ചെന്നതാണ് കേസിലെ പ്രധാന ആരോപണം. ക്രൈംബ്രാഞ്ച് നടത്തിയ അന്വേഷണത്തില്‍ 320ലേറെ ബാങ്ക് അക്കൗണ്ടുകള്‍ പരിശോധിച്ചതായാണ് റിപ്പോര്‍ട്ട്. പ്രേംകുമാറിന്‍റെയും അടുത്ത ബന്ധുക്കളുടെയും അക്കൗണ്ടുകളിലേക്ക് നിക്ഷേപകരുടെ പണം എത്തിയിട്ടുണ്ടെന്നാണ് അന്വേഷണസംഘത്തിന്‍റെ സംശയം. ഹോട്ടലുകള്‍, റിസോര്‍ട്ടുകള്‍, തിയറ്ററുകള്‍ തുടങ്ങിയ സ്ഥാപനങ്ങളുമായി ബന്ധപ്പെട്ട ഇടപാടുകളും പരിശോധിക്കുന്നുണ്ട്. ചെന്നൈയിലെ ഹെഡ് ഓഫീസിലെ പരിശോധനയ്ക്ക് ഈ പണമൊഴുക്കിന്‍റെ രേഖകള്‍ നിര്‍ണായകമാകുമെന്നാണ് വിലയിരുത്തല്‍. തൃശൂരിലെ രാഗം തിയറ്റര്‍ ഇടപാടും കേസിലുള്‍പ്പെടുന്നു. ബിഎല്‍എം 70.50 കോടി രൂപയ്ക്ക് തിയറ്റര്‍ വാങ്ങിയതുമായി ബന്ധപ്പെട്ട ഇടപാടുകളില്‍നിന്ന് 19.95 കോടി രൂപ മുന്‍ ഉടമയുടെ അക്കൗണ്ട് വഴി പ്രേംകുമാറിന്‍റെ വ്യക്തിഗത അക്കൗണ്ടിലേക്ക് എത്തിയെന്നാണ് ക്രൈംബ്രാഞ്ചിന്‍റെ കണ്ടെത്തല്‍. ബിഎല്‍എമ്മിന്‍റെ പണം ഉപയോഗിച്ച് സ്വത്തുക്കള്‍ വാങ്ങിയശേഷം അവയുടെ ഉടമസ്ഥാവകാശം വ്യക്തികളിലേക്കോ കുടുംബാംഗങ്ങളിലേക്കോ മാറ്റിയിട്ടുണ്ടോ എന്നതും അന്വേഷണത്തിന്‍റെ പ്രധാന ഭാഗമാണ്. ഇതിന്‍റെ തുടര്‍ച്ചയായാണ് സ്വത്തുക്കളുടെയും ബാങ്ക് രേഖകളുടെയും വിശദമായ പരിശോധനയ്ക്ക് പ്രാധാന്യം ലഭിക്കുന്നത്.
ചെന്നൈ ആസ്ഥാനമായ ബ്രിയോസ് ഫിന്‍വെസ്റ്റ് എന്ന സ്ഥാപനവുമായുള്ള സാമ്പത്തിക ഇടപാടുകളും അന്വേഷണത്തില്‍ പുറത്തുവന്നിട്ടുണ്ട്. 2023 ഏപ്രില്‍ മുതല്‍ 2024 ഡിസംബര്‍ വരെയുള്ള കാലയളവില്‍ ബിഎല്‍എം അക്കൗണ്ടുകളില്‍നിന്ന് ഈ സ്ഥാപനത്തിലേക്ക് ഏകദേശം 119 കോടി രൂപ കൈമാറിയതായും അതില്‍ 35 കോടി രൂപ തിരിച്ചെത്തിയതായും റിപ്പോര്‍ട്ടുകളുണ്ട്. പണം കൈമാറിയതിന്‍റെ യഥാര്‍ഥ കാരണം എന്താണ്, ഈ ഇടപാടുകള്‍ക്ക് ബിഎല്‍എം ഡയറക്ടര്‍ ബോര്‍ഡിന്‍റെ അനുമതിയുണ്ടായിരുന്നോ, പണം പിന്നീട് എവിടേക്ക് പോയി തുടങ്ങിയ ചോദ്യങ്ങള്‍ക്കും അന്വേഷണത്തില്‍ ഉത്തരം കണ്ടെത്തേണ്ടതുണ്ട്. ചെന്നൈയിലെ ഓഫീസ് കേന്ദ്രീകരിച്ചുള്ള പരിശോധനയില്‍ ഇത്തരം ഇടപാടുകളുടെ രേഖകള്‍ക്ക് പ്രാധാന്യമുണ്ടാകും.
മൂന്നാറിലെ വൈബ് റിസോര്‍ട്ടുമായി ബന്ധപ്പെട്ട ഇടപാടുകളും അന്വേഷണവിധേയമാണ്. ഫോസ്കിയ റിസോര്‍ട്ട്സ് എന്ന സ്ഥാപനത്തിലേക്ക് ബിഎല്‍എം അക്കൗണ്ടുകളില്‍നിന്ന് 28.32 കോടി രൂപയിലധികം കൈമാറിയതായാണ് റിപ്പോര്‍ട്ട്. തമിഴ്നാട്ടിലെ കേബിള്‍ ടെലിവിഷന്‍ സ്ഥാപനവുമായി ബന്ധപ്പെട്ട് 16 കോടി രൂപയുടെ ഇടപാടും അന്വേഷണസംഘം പരിശോധിക്കുന്നുണ്ട്. കേരളത്തിലും തമിഴ്നാട്ടിലുമായി വ്യാപിച്ചുകിടക്കുന്ന ഇത്തരം ഇടപാടുകള്‍ക്ക് പിന്നില്‍ ഒരേ സാമ്പത്തിക ശൃംഖലയാണോ പ്രവര്‍ത്തിച്ചതെന്ന കാര്യവും പരിശോധിക്കേണ്ടതുണ്ട്. അതേസമയം, നിക്ഷേപകര്‍ കൂട്ടത്തോടെ പണം തിരിച്ചുചോദിക്കുന്നതും ബിഎല്‍എമ്മിന് വലിയ വെല്ലുവിളിയാണ്. കാലാവധി പൂര്‍ത്തിയായ നിക്ഷേപങ്ങള്‍ തിരികെ ലഭിക്കുമോ എന്ന ആശങ്കയിലാണ് പലരും. വിരമിച്ച ജീവനക്കാര്‍, പ്രവാസികള്‍, സാധാരണ കുടുംബങ്ങള്‍ എന്നിവരടക്കം വലിയൊരു വിഭാഗമാണ് സ്ഥാപനത്തില്‍ പണം നിക്ഷേപിച്ചിട്ടുള്ളത്. നിക്ഷേപത്തുക തിരികെ ലഭിക്കുന്നില്ലെന്ന പരാതികള്‍ വിവിധ പൊലീസ് സ്റ്റേഷനുകളില്‍ എത്തിയിട്ടുണ്ട്. പുതിയ നിക്ഷേപങ്ങള്‍ കുറഞ്ഞാല്‍ നിലവിലുള്ള നിക്ഷേപകരുടെ പണം തിരിച്ചുനല്‍കാനുള്ള സ്ഥാപനത്തിന്‍റെ ശേഷിയെയും അത് ബാധിച്ചേക്കാം. ഇതിനിടെ പ്രേംകുമാറിനെതിരായ ക്രൈംബ്രാഞ്ച് നടപടികളും കേസില്‍ ശ്രദ്ധേയമായി.
ഒക്ടോബര്‍ 29ന് ചെന്നൈയിലെ വസതിയില്‍നിന്നാണ് കേരള ക്രൈംബ്രാഞ്ച് സംഘം അദ്ദേഹത്തെ കസ്റ്റഡിയിലെടുത്തത്. പിന്നീട് കോഴിക്കോട് കോടതിയില്‍ ഹാജരാക്കിയെങ്കിലും അറസ്റ്റ് നടപടികളില്‍ നിയമപരമായ വീഴ്ചയുണ്ടെന്ന പ്രതിഭാഗത്തിന്‍റെ വാദം അംഗീകരിച്ച് കോടതി വിട്ടയച്ചു. അറസ്റ്റ് നടപടികളിലെ വീഴ്ച ചൂണ്ടിക്കാട്ടിയായിരുന്നു കോടതിയുടെ നടപടി. എന്നാല്‍ കേസ് അവസാനിച്ചിട്ടില്ലെന്നും നിയമപരമായ നടപടിക്രമങ്ങള്‍ പാലിച്ച് വീണ്ടും അറസ്റ്റിനുള്ള നീക്കം നടത്തുമെന്നും ക്രൈംബ്രാഞ്ച് വ്യക്തമാക്കിയിരുന്നു. ബിഎല്‍എമ്മിന്‍റെ ഡയറക്ടര്‍ ബോര്‍ഡിനും ഏജന്‍റുമാര്‍ക്കും ഈ സംഭവവികാസങ്ങള്‍ വലിയ സമ്മര്‍ദ്ദമാണ് സൃഷ്ടിക്കുന്നത്. നിക്ഷേപം സ്വീകരിക്കുന്നതിലും പണം വിനിയോഗിക്കുന്നതിലും ഏജന്‍റുമാര്‍ക്ക് എന്തെങ്കിലും പങ്കുണ്ടായിരുന്നോ എന്ന ചോദ്യവും ഉയരുന്നുണ്ട്. നിക്ഷേപകരില്‍നിന്ന് പണം ശേഖരിച്ചവര്‍ക്ക് സ്ഥാപനത്തിന്‍റെ സാമ്പത്തിക സ്ഥിതിയെക്കുറിച്ച് എന്തെല്ലാം അറിയാമായിരുന്നു എന്നതും അന്വേഷണത്തില്‍ പ്രസക്തമാകും. പണം സ്വീകരിച്ചശേഷം അത് ഏതു അക്കൗണ്ടുകളിലേക്ക് കൈമാറി എന്നതിന്‍റെ രേഖകള്‍ പരിശോധിച്ചാല്‍ മാത്രമേ ഓരോരുത്തരുടെയും ഉത്തരവാദിത്തം വ്യക്തമാകൂ. ബിഎല്‍എമ്മിനെതിരായ ആരോപണങ്ങള്‍ പുറത്തുവന്നതിനു പിന്നാലെ വാര്‍ത്തകള്‍ നല്‍കിയ മാധ്യമങ്ങള്‍ക്കും ഭീഷണികള്‍ നേരിടേണ്ടിവന്നതായി ആരോപണമുണ്ട്.
