കാഞ്ഞങ്ങാട്: ഐങ്ങോത്ത് ദേശീയപാതയില്‍ ഹൈവേ പട്രോളിങിനിടെ കാറിടിച്ച് ഗുരുതര പരിക്കേറ്റ പോലീസുകാരുടെ കാലുകള്‍ മുറിച്ചു നീക്കി. സിവില്‍ പോലീസ് ഓഫീസര്‍മാരായ വലിയപറമ്പ് സ്വദേശി സൂരജ് (32), കുന്നുംകൈ സ്വദേശി അലോഷ്യസ്( 39) എന്നിവരുടെ കാലുകളാണ് മംഗലാപുരം തേജസ്വിനി ആശുപത്രിയില്‍ ശസ്ത്രക്രിയയിലൂടെ മുറിച്ചു നീക്കിയത്. ഒരാളുടെ കാല്‍ മുട്ടിന് താഴെ വച്ചും മറ്റൊരാളുടെ കാല്‍പാദവുമാണ് മുറിച്ച് നീക്കിയത്. വ്യാഴാഴ്ച ഐങ്ങോത്ത് വാഹന പരിശോധനയ്ക്കിടെയാണ് സംഭവം. ദേശീയപാതയോരത്ത് അപകടസാധ്യതയുയര്‍ത്തി നിര്‍ത്തിയ നാഷണല്‍ പെര്‍മിറ്റ് ലോറികളെ ഇവിടെ നിന്ന് മാറാന്‍ നിര്‍ദേശിക്കുകയായിരുന്നു ഉദ്യോഗസ്ഥര്‍. ഈ സമയത്ത് കാഞ്ഞങ്ങാട് നിന്ന് കണ്ണൂരിലെ ആശുപത്രിയിലേക്ക് പോവുകയായിരുന്ന കാര്‍ ഇതുവഴി വന്നു. അമിതവേഗത്തിലായിരുന്ന കാര്‍ നിയന്ത്രണം തെറ്റിയാണ് അപകടമുണ്ടായത്. പൊലീസ് ജീപ്പിന്‍റെ പിന്നില്‍ നില്‍ക്കുകയായിരുന്ന ഉദ്യോഗസ്ഥരെ ഇടിച്ച കാര്‍, പിന്നീട് പോലീസ് ജീപ്പിലിടിച്ചാണ് നിന്നത്. ഈ അപകടത്തില്‍ പോലീസുകാര്‍ ഇരുവാഹനങ്ങള്‍ക്കും ഇടയില്‍പെട്ടു. പോലീസുകാരെ ഉടന്‍ തന്നെ കാഞ്ഞങ്ങാട്ടെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും പരുക്ക് ഗുരുതരമായതിനാല്‍ മംഗലാപുരത്തേക്ക് മാറ്റുകയായിരുന്നു. പോലീസ് ക്ലബ്ബിലെ മുന് ഫുട്ബോള്‍ താരം കൂടിയാണ് സൂരജ്. കാല്‍ മുറിച്ചുമാറ്റിയ സാഹചര്യത്തില്‍ ഇനി ഇവര്‍ക്ക് പോലീസ് സര്‍വീസില്‍ തുടരാന്‍ സാധിച്ചേക്കില്ല. മറ്റേതെങ്കിലും വകുപ്പിലെ തസ്തികയിലേക്ക് ഇവര്‍ക്ക് മാറേണ്ടി വരും. അപകടവിവരമറിഞ്ഞ് സംസ്ഥാന ആഭ്യന്തര മന്ത്രി രമേശ് ചെന്നിത്തല, തൃക്കരിപ്പൂര്‍ എംഎല്‍എ സന്ദീപ് വാര്യര്‍ എന്നിവര്‍ ആരോഗ്യസ്ഥിതിയെ കുറിച്ച് അന്വേഷിച്ചു. ഇരു പോലീസുകാര്‍ക്കും ആവശ്യമായ എല്ലാ സഹായങ്ങളും നല്‍കാന്‍ ഇരുവരും ജില്ലാ പോലീസ് മേധാവിയോട് ആവശ്യപ്പെട്ടു.
ഐങ്ങോത്ത് വാഹനാപകടം: പരിക്കേറ്റ പോലീസുകാരുടെ കാലുകള്‍ മുറിച്ചുമാറ്റി
