പുത്തൂര്‍: ധര്‍മ്മസ്ഥല ക്ഷേത്ര ദര്‍ശനത്തിനെത്തിയ സ്ത്രീയുടെ ബാഗില്‍ നിന്ന് 76 ഗ്രാം സ്വര്‍ണ്ണം കവര്‍ന്ന കേസില്‍ അമ്മയും മകളും അറസ്റ്റില്‍. ഹുബ്ബള്ളി സ്വദേശികളായ ബേബിജാന്‍ (59), മസാബി എന്ന ആരതി (34) എന്നിവരെയാണ് ധര്‍മ്മസ്ഥല പോലീസ് അറസ്റ്റു ചെയ്തത്. മെയ് മൂന്നിനാണ് കേസിനാസ്പദമായ സംഭവം നടന്നത്. ആന്ധ്രാപ്രദേശില്‍ നിന്ന് ദര്‍ശനത്തിനെത്തിയ സ്ത്രീയാണ് മോഷണത്തിന് ഇരയായത്. അന്നു തന്നെ പോലീസില്‍ പരാതി നല്‍കിയിരുന്നുവെങ്കിലും മോഷ്ടാക്കളെ കണ്ടെത്താന്‍ കഴിഞ്ഞില്ല. ഇതിനിടയിലാണ് മറ്റൊരു മോഷണ കേസില്‍ ബേബി ജാനും മകളും അറസ്റ്റിലായത്. ഇതോടെ തെളിയാതെ കിടന്നിരുന്ന നിരവധി സമാനമായ കേസുകള്‍ക്ക് തുമ്പുണ്ടാക്കാനായതായി പോലീസ് വൃത്തങ്ങള്‍ പറഞ്ഞു. ചോദ്യം ചെയ്യലിലാണ് ധര്‍മ്മസ്ഥലയില്‍ എത്തിയ ആന്ധ്രാപ്രദേശ് സ്വദേശിനിയുടെ ബാഗില്‍ നിന്ന് സ്വര്‍ണ്ണം കവര്‍ന്ന കേസിനും തുമ്പായത്. മോഷണം പോയ ആഭരണങ്ങള്‍ പോലീസ് കണ്ടെടുത്തു.
ഭക്തരുടെ സ്വര്‍ണ്ണവും പണവും മോഷ്ടിക്കുന്ന അമ്മയും മകളും അറസ്ററില്
