ബാംഗ്ലൂര്‍: കര്‍ണാടകത്തിലെ കോണ്‍ഗ്രസ് നേതാക്കളെ ലക്ഷ്യമിട്ട് വ്യാജ ഒളിക്യാമറ ദൃശ്യങ്ങള്‍ മെനഞ്ഞ സംഭവത്തില്‍ കടുത്ത നടപടിയുമായി കോണ്‍ഗ്രസ് നേതൃത്വം. മുന് കെപിസിസി ജനറല്‍ സെക്രട്ടറി കൃപ ആല്‍വയെ പുറത്താക്കി. ആറു വര്‍ഷത്തേക്കാണ് പാര്‍ട്ടിയുടെ പ്രാഥമികാംഗത്വത്തില്‍ നിന്ന് പുറത്താക്കുന്നത്. കര്‍ണാടകാ പ്രദേശ് കോണ്‍ഗ്രസ് കമ്മറ്റിയുടെ അധ്യക്ഷന്‍റെ കര്‍ശന നിര്‍ദ്ദേശപ്രകാരമാണ് ഈ നടപടി. പാര്‍ട്ടിക്ക് കനത്ത നാണക്കേടുണ്ടാക്കിയ ഗൂഢാലോചനയില്‍ പങ്കാളിയാണ് എന്ന ആക്ഷേപത്തെ തുടര്‍ന്നാണ് നടപടി.കെപിസിസി വൈസ് പ്രസിഡന്‍റ് എം. നാരായണസ്വാമിയാണ് ഇതുസംബന്ധിച്ച ഔദ്യോഗിക ഉത്തരവ് പുറത്തിറക്കിയത്. സംഭവത്തില്‍ നേരത്തേ വിശദീകരണം ആവശ്യപ്പെട്ട് കൃപ ആല്‍വയ്ക്ക് കാരണം കാണിക്കല്‍ നോട്ടിസ് നല്‍കിയിരുന്നു. എന്നാല്‍ അവര്‍ യാതൊരു മറുപടിയും നല്‍കിയിരുന്നില്ല. ഇതോടെ കൃപ ആല്‍വ പാര്‍ട്ടി വിരുദ്ധ പ്രവര്‍ത്തനങ്ങളില്‍ ഏര്‍പ്പെട്ടതായും ഹൈക്കമാന്‍ഡിന്‍റെ പ്രതിച്ഛായ തകര്‍ക്കാന്‍ ശ്രമിച്ചതായും കണ്ടെത്തി. കര്‍ണാടക മുഖ്യമന്ത്രി സിദ്ധരാമയ്യ ഉള്‍പ്പെടെയുള്ളവര്‍ അകപ്പെട്ടു പോയ വിവാദമായിരുന്നു ഇത്.
സിദ്ധരാമയ്യയെ പ്രതിക്കൂട്ടില്‍ നിര്‍ത്താനായി ഒരു വ്യാജ അപകീര്‍ത്തി വീഡിയോ നിര്‍മ്മിച്ചതിന് പിന്നില്‍ കൃപ ആല്‍വയുടെ നേതൃത്വത്തിലുള്ള സംഘമാണെന്നായിരുന്നു ആരോപണം. നീക്കം മനസ്സിലാക്കിയ സിദ്ധരാമയ്യ ഉടന്‍ തന്നെ നിയമനടപടികളിലേക്ക് കടക്കുകയും വീഡിയോ ദൃശ്യങ്ങള്‍ മാധ്യമങ്ങളില്‍ പ്രക്ഷേപണം ചെയ്യുന്നത് തടഞ്ഞുകൊണ്ട് കോടതിയില്‍ നിന്ന് ഇടക്കാല സ്റ്റേ വാങ്ങി പ്രതിരോധം തീര്‍ക്കുകയും ചെയ്തിരുന്നു. കോണ്‍ഗ്രസ് നേതൃത്വത്തെ പ്രതിരോധത്തിലാക്കാന്‍ ലക്ഷ്യമിട്ട് പ്രചരിച്ച ഈ ലൈംഗികാരോപണ വീഡിയോ പൂര്‍ണമായും കെട്ടിച്ചമച്ചതാണെന്ന് ബാംഗ്ലൂര്‍ പൊലീസിന്‍റെ ഔദ്യോഗിക അന്വേഷണത്തില്‍ വ്യക്തമായി. കേസില്‍ ലഭിച്ച തെളിവുകളും സാക്ഷിമൊഴികളും കൃത്യമായി വിശകലനം ചെയ്തതില്‍ നിന്നും അത്തരത്തിലുള്ള ഒരു സംഭവമേ നടന്നിട്ടില്ലെന്ന നിര്‍ണായക കണ്ടെത്തലിലാണ് പൊലീസ് എത്തിച്ചേര്‍ന്നിരിക്കുന്നത്. രാഷ്ട്രീയ പ്രേരിതമായ ഈ വ്യാജ വിവാദം കോണ്‍ഗ്രസിനുള്ളില്‍ വന്‍ കോലാഹലത്തിനാണ് തിരികൊളുത്തിയത്.
